Nadunor dagiti dua a motorista kalpasan ti panagdinnungpar iti motorsiklo ken traysikel iti Barangay Danuman West, Sta. Maria, Ilocos Sur.
Maibasar iti imbestigasion, daldalayasaten ti motorsiklo a minaneho ti agtawen-iti-sangapulo ket innem a menor de edad ti agpa-amianan a direksion idin ta immagaw iti linya isu a nagdinnungparda iti traysikel a minaneho ti lalaki nga agtawen iti uppat a pulo ket lima.
Gapu iti kapigsa ti impact ti panagdinnungpar, naipurwak iti kalsada ti menor de edad ken mano a metro pay a naguyas ti motorsiklona.
Agpada a nagsagaba dagiti dua a drayber iti dunor isu a naipaagasda iti Ilocos Sur District Hospital–Narvacan para iti pannakatamingda.
Awan ti suot a helmet ti menor de edad ken awan ti naipakitana a driver’s license-na.
Agpada pay nga adda dadael dagiti dua a lugan a naipan iti Sta. Maria Municipal Police Station para iti proper disposition.
