Indagadag ti Commission on Human Rights (CHR) iti gobierno ken amin a sektorna a papigsaenda ti panangipateg ken panangsalaknib kadagiti ubbing bayat ti panangrambak iti National Children’s Month ita a bulan ti Nobiembre.
Segun iti CHR, masapul a masalakniban dagiti ubbing babaen ti panagsagana sakbay, kabayatan, ken kalpasan ti didigra wenno emerhensia.
Impaganetget pay ti departamento a rumbeng a mairaman ti panangaywan kadagiti ubbing ken awan koma ti mabati, nangruna dagiti ubbing nga addaan iti diperensia.
Ti tema ita a tawen para iti Children’s Month ket “Stand Up! Respond and Care: With Prepared Children, the Nation Is Safer,” a pakairamanan pay ti panangipangpangruna iti kinatalged dagiti ubbing iti nadumaduma a didigra kas iti bagyo, layus, ginggined, ken armado a panagdadangadang.
