Pinagduaduaan manen ti kampo ni Senador Ronald “Bato” Dela Rosa ti legal a pagbatayan ti pammilin ti gobierno iti panagsuko ken ti pannakaitukon ti P50-M a gunggona para iti impormasion a mangitunda iti pannakatiliwna.
Impaganetget ti abogadona a ni Atty. Israelito Torreon nga awan ti nakaibatayan iti Konstitusion ti pannakatiliw ti senador gapu ta awan ti warrant nga impaulog ti maysa a hues ti Pilipinas kalpasan a naikeddeng ti probable cause.
Kinuestionaran pay ni Torreon ti kinaumiso ken enforcement iti Pilipinas ti International Criminal Court (ICC) arrest warrant, kasta met ti P50-M a gungguna, a kunana nga awanan iti nalawag a batayan, proseso, ken gubuayan ti pondo.
Kinuna ti task force nga agtultuloy ti panangrepaso iti impormasion maipapan iti ayan ni Dela Rosa, idinto nga awan pay ti nailasin nga espesipiko a grupo a mapapati a mangsalsalaknib iti senador.
