Indagadag ni Akbayan party-list Rep. Percival Cendaña ti pannakaipasa ti House Bill No. 11495 wenno ti Animal Life Advocacy and Guardianship Act (ALAGA) kalpasan a nasarakan dagiti bangkay ti 29 a taraken nga aso ken pusa iti bakante a lote sadiay San Jose del Monte, Bulacan.
Kinondenar ni Cendaña ti pannakaibelleng dagiti bangkay ti 26 nga aso ken tallo a pusa, a kunana a saan a rumbeng a maibilang nga ordinario a basura ken rumbeng a maikkan iti umiso a pannakaitabon.
Ikagkagumaan ti gakat a baliwan ti Animal Welfare Act tapno mapapigsa ti proteksion dagiti animal ken mangikeddeng kadagiti naing-inget a pagannurotan kadagiti pasilidad a mangkontrol kadagiti ayup, pakairamanan ti umiso a dokumentasion ken panagireport.
Ikeddeng pay ti gakat a dagiti laeng lisensiado a beterinario ti mabalin nga ag-euthanasia kadagiti animal a nakaro ti pannakadangran, nakaro ti sakitda, wenno addaan iti makaakar a sakit, a masapul a maipakaammo iti publiko walo nga oras sakbay ti proseso.
