Binilin ni Bureau of Corrections (BuCor) Director General Gregorio Pio Catapang Jr. dagiti amin a management dagiti pagbaludan ken penal farm iti pagilian a mangipasa iti contingency plan kontra iti posible nga epekto ti El Niño.
Gagem ti pammilin a masigurado ti agtultuloy a probision ti serbision, kasta payen ti salun-at, kinatalged, ken pagsayaatan dagiti person deprived of liberty (PDL) ken dagiti kameng ti BuCor iti baet ti manamnama a tikag ken kinakurang iti danum.
Impaganetget ti opisial ti kinapateg ti panangisagana iti suplay ti taraon, danum, serbisio-medikal, nasayaat a bentilasion, ken panangkita kadagiti kwalipikado a pasyente wenno vulnerable a PDL a napaspas a maapektaran iti nakaro a pudot.
Innayon ti BuCor nga agingga laengen November 2 dagiti prison superintendent tapno maipasa dagiti planoda iti Office of the Director General kas paset iti panangpapigsada iti disaster preparedness.
