Saan nga ipalubos ti Simbaan Katolika ti temporaryo a panangiyawid kadagiti urn a naglaon iti dapo dagiti pimmusay nga ay-ayaten iti biag iti panangrambak iti All Saints’ Day inton November 1 ken All Souls’ Day inton November 2.
Segun ken ni Cathedral Vice Rector Fr. Vicente Gabriel Bautista, no naikabilen iti pantsong ti columbarium ti urn, nasken laeng nga agtalinaeden idiay kas lugar a paginanaan dagiti pimmusay.
Dayta ket kalpasan ti panangiwaragawag ti Mandaluyong City a palubosanda dagiti pamilia a mangiyawid kadagiti urn ti pimmusay nga ay-ayatenda iti biag manipud Oktubre 22 agingga 29 ken isublidanto inton November 5.
Gagem ti addang a maliklikan ti panangdarup dagiti adu a tao a bumisita iti kamposanto ken maikkan gundaway ti pamilia a mangdaydaydaw kadagiti kabagyanda a pimmusay.
