Nangbukel ti Philippine National Police (PNP) kadagiti task group iti amin a rehion ti pagilian tapno tumulong iti panangsapul ken panangtiliw ken ni Senador Ronald “Bato” Dela Rosa, malaksid pay iti immunan a nabukel a tracker team.
Segun ken ni PNP Deputy Chief for Administration PLTGen. Wilson Joseph Lopez, paset daytoy iti reorganisasyon ken panangpalawa iti operasionda tapno matunton ti senador.
Impasigurado pay ti PNP a nakasaganada iti aniaman a posible a sitwasion iti panangiserbi iti warrant of arrest ken ipatungpalda ti maximum tolerance tapno maliklikan ti riribuk.
Kabayatanna, pinasingkedan ni Lopez nga awan pay ti naawatda nga impormasion mainaig iti grupo a posible a mangilemlemmeng ken ni Dela Rosa, ngem paingetenda ti panagsapulda.
