Intampok ni Commission on Higher Education (CHED) Chairperson Shirley Agrupis ti kinapateg ti Blue Economy wenno ocean-based economy iti panagdur-as ken konserbasion ti ekonomia ti Pilipinas ken dadduma pay a pagilian a kameng ti ASEAN.
Imbingay ni Agrupis a nabaknang ti rehion iti biodiversity ta pagtaengan daytoy ti 23 a kita ti seagrass iti lubong, 35 a porsiento kadagiti korales, nasurok nga 600 a kita ti natangken a korales, ken 1,300 a kita ti ikan nga agnanaed kadagiti coral reef.
Intampokna pay ti kalawa dagiti kinabaknang ti baybay ti rehion, nga addaan 8.94 milion a kilometro kuadrado ti taaw ken ti aplaya ket addaan iti agarup a 173,000 a kilometro.
Gapu iti daytoy a rason, impaganetgetna ti kinapateg ti natalged a pannakausar ken pannakakonserba dagiti kinabaknang iti baybay tapno mapalawa dagiti gundaway ti ekonomia bayat a masalakniban dagiti natural resources.
