Indagadag ni Outgoing Department of Public Works and Highways (DPWH) Secretary Vince Dizon kadagiti staff ti ahensia a kissayan ti saritaan ken ad-adda nga ipamaysada ti trabaho tapno maipatungpal dagiti kasapulan a reporma.
Inadmitir ni Dizon a saan a nalaka ti restructuring ti dakkel nga ahensia gapu ta adu dagiti parikut ken pagkurangan a masapul a tamingen iti laksid dagiti naipatungpal a reporma.
Impaganetgetna ti kinapateg ti panangpadur-as kadagiti sistema a mangipasigurado nga agtultuloy ti reporma uray kalpasan ti panagbalbaliw ti liderato, babaen iti direktiba ni Presidente Ferdinand Marcos Jr.
Iti maudi a mensahena kas mangidaulo, impalagip ni Dizon kadagiti opisial ken staff nga agtitinnulongda para iti ahensia ken pinaregtana ida nga ituloyda ti trabahoda para iti pagsayaatan ti DPWH.
