Indagadag ti Department of Education (DepEd) ken Meta kadagiti nagannak a kanayon a makisaritada kadagiti annakda maipapan iti panagusarda iti social media tapno masalaknibanda manipud kadagiti peggad iti online.
Namakdaar ni Education Secretary Sonny Angara kontra kadagiti grupo nga agpammarang a fraternities wenno gagayyem ngem paregtaenda dagiti ubbing nga agaramid iti iligal nga aktibidad.
Kabayatanna, impaganetget ni Meta Philippines Head of Public Policy Gio Tingson ti kinapateg ti natalged a panagbibinninglay iti impormasion, umiso a panangusar iti oras iti online ken pannakaammo kadagiti tattao a kasarsarita iti social media.
Kas paset ti kampania, nangangay ti Meta iti libre a forum ken lima nga aldaw nga eksibit a “Digital Dialogue in Real Life: Safety Starts with Conversation” idiay Glorietta, Makati, nga agpatingga inton Oktubre 30 ken panggepna a palawaen ti pannakaammo dagiti nagannak ken agtutubo maipapan iti digital safety.
