Nangipila ti Office of the Ombudsman dagiti kaso a graft at malversation iti Sandiganbayan kontra iti innem nga empleyado ti DPWH Region XII ken pito a pribado nga indibidwal mainaig iti maipagarup a P491.9 milyon road right-of-way (RROW) scam idiay General Santos City.
Karaman iti napilaan ti kaso da dati a Regional Director Subair Saro Diron ken dati nga Assistant Regional Director Laureano B. Suan Jr. kalpasan a makakita ti Ombudsman ti naan-anay nga ebidensia para iti 18 counts ti malversation ken 18 counts ti panaglabsing iti Anti-Graft and Corrupt Practices Act.
Nangrugi ti kaso iti panagsukisok ti NBI mainaig ti bayad iti RROW iti 18 a parcel land para iti Digos-Makar National Road a maipagarup a peke a dokumento dagiti nausar.
Basar iti statement ti witness a ni Roberto Catapang Jr., naaddaan ti panagko-kontsabos tapno padakkelen ti gatad ti pondo babaen ti 2009 appraisal value para kadagiti daga a naala idi pay laeng paset ti dekada ’90.
Kalaksidan ti kaso a kriminal, imbilin pay ti Ombudsman ti pannaka-ikkat iti serbisio ti dati a Legal Officer ti DPWH Region XII a ni Ansare Mariga Busran.
