Pinadayawan ni Department of Education (DepED) Secretary Sonny Angara ti 18 a mannursuro, lider ti pagadalan ken support staff gapu iti dedikasion, nainget a panagtrabaho ken disiplinada iti trabaho iti maika-14 nga Ambassador Cabangon Chua Gold Award for Education.
Impaganetget ni Angara a napateg ti pudno a serbisio uray no awan ti makakita wenno mangted iti bigbig, ken kanayon a maikonsiderar ti pagimbagan dagiti estudiante ken ti komunidad.
Karaman kadagiti napadayawan ket walo a mannursuro, lima nga school ken division heads, ken lima nga administrative staff manipud iti nadumaduma a paset ti pagilian.
Ti nasao a pammadayaw ket insagana ti Fortune Life Insurance Company ken MaryLindbert International iti pannakitinnulong ti DepEd tapno maitandudo ti nainget a panagtrabaho, disiplina, panagbasa ken agtultuloy a panagdur-as dagiti mannursuro.
