Indagadag ni Senate President Pro Tempore Vicente Sotto III ti Senate Bill No. 2281 wenno ti National Reintegration Act tapno matulongan dagiti dati a balud a mangrugi manen ken agsubli iti kagimongan.
Saklawen ti gakat ti tulong iti panggedan, balay, edukasion, serbisio ti salun-at ken psychosocial support tapno mapasayaat ti pannakilangenda iti komunidad kalpasan ti pannakawayawayada.
Karaman pay iti gakat ti pannakaibangon dagiti halfway houses nga agserbi a temporario a pagkamangan, kasta met ti family counseling ken psychosocial services iti umuna nga innem a bulan kalpasan ti pannakawayawayada.
Mangidaulo ti Department of Social Welfare and Development (DSWD) iti pannakaipatungpal ti programa, a makitinnulong kadagiti dadduma nga ahensia, tapno maikkan dagiti dati a balud iti gundaway a mangreporma iti biagda ken malapdan ti panagaramidda manen iti krimen.
