Namakdaar ti Land Transportation Franchising and Regulatory Board (LTFRB) kadagiti taxi operators ken draybers kontra iti nangato a singir ti pamasahe, panangpili kadagiti pasahero ken dadduma pay a panaglabsing iti baet ti manamnama a panagadu ti bilang dagiti agbiahe ita nga Undas.
Segun kenni LTFRB Acting Chairperson Atty. Greg Pua Jr., mabalin a masuspende wenno makanselar ti Certificate of Public Convenience (CPC) dagiti operators a naduktalan a naglabsing kadagiti pagannurotan.
Binilin pay ni Pua dagiti enforcers a mangisayangkat iti surprise ken random inspections, pakairamanan ti pannakausar dagiti mystery riders, tapno masigurado ti panagtungpal dagiti taxi drivers kadagiti pagannurotan.
Manamnama agingga 1.9-M a pasahero ti agusar ti Parañaque Integrated Terminal Exchange manipud Oktubre 25 agingga Nobiembre 4, idinto a nasurok a 1.93-M a biahero ti manamnama kadagiti sangladan iti intero a pagilian manipud Oktubre 27 agingga Nobiembre 5.
