Pinasingkedan ni Presidential Communications Office (PCO) Acting Sec. Lino Cayetano a dandani amin a political appointee iti salinong ti nadakamat nga opisina ket nagipasa ti bukod da a courtesy resignation.
Segun ken ni Cayetano, dumaldalan iti nainget a proseso dagiti naipasa a courtesy resignation ken inaldaw ket adda mapaspasamak nga evaluation iti performance dagiti opisial ti PCO.
Impaganetget ti opisial a masapul nga amin nga attached agency ket aggargaraw ken agtartarabaho.
Kabayatanna, agtalinaed iti puwesto ni Presidential Communications Office (PCO) Undersecretary ken Palace Press Officer Claire Castro.
Pinasingkedan ni Cayetano a maysa a ‘treasure’ ni Castro isu nga impakaammo na a saanna nga inawat ti impasa na a courtesy resignation.
