Im-imbestigaran dagiti pannakabagi ti linteg ti maysa nga agtawen-iti-sangapulo ket lima a babai, Grade 11 student ti Ilocos Sur National High School kalpasan a nag-post iti ladawan ti saan pay a mabigbig a paltog iti social media account-na.
Maibasar iti inisyal nga imbestigasion, mapapati a nai-post ti ladawan idi Oktubre 1 ken adda karamanna a mensahe wenno caption a mangsalsaludsod no asino ti kayatna nga umuna.
Maysa a concerned citizen ti nakaala iti screenshot ti nasao a post ket impakaammona iti Department of Education legal officer tapno agkiddaw iti balakad ken seguridad iti kapulisan.
Nangideploy ti Vigan City Police Station iti kamengda iti ISNHS sakbay a nangrugi ti klase ita nga aldaw tapno tumulong iti security checks kadagiti gate dagiti pagadalan.
Makikamkammayeten ti kapulisan iti pagadalan, ken kapatangdanto ti nagannak ti menor d edad, kasta payen a nagkiddawda iti tulong iti Women and Children Protection Desk no kasapulan.
Agtultuloy ti pannakikammayet ti kapulisan iti Ilocos Sur Police Crime Response Team mainaig iti insidente.
Malaksid dayta, madukduktalan no nagtaudan ti paltog iti ladawan.
