Inlawlawag ti Department of Justice a ti panangiruar iti subpoena ket saan a dagus a kayatna a sawen a “guilty” ti maysa a respondent iti reklamo.
Segun ken ni DOJ Usec. Ian Norman Dato, ti mairuruar a subpoena ket paset iti ‘preliminary investigation stage’ ti ‘panel of prosecutors iti reklamo nga ig-iggananda.
Ditoy a maikkan gundaway dagiti respondent a sumungbat kadagiti pammabasul a sangsangwenda sakbay nga agturong iti panangipila iti kaso.
Maipalagip a binilin ti DOJ da Sen. Robin Padilla, Lt. Col. Jean Robles ken dadduma pay a sumango iti ‘panel of prosecutors’ tapno mangipasa iti ‘counter-affidavits’ agraman dagiti ebidensia.
Agpada a sangsangwenda ti reklamo nga ‘obstruction of justice’ mainaig iti panaglibas ni Sen. Bato Dela Rosa iti imlementasion ti arrest warrant ti International Criminal Court.
