Binalakadan ti Department of Labor and Employment (DOLE) dagiti babassit a negosio a mabalinda ti agkiddaw iti exemption iti pannakaipatungpal ti wage hike.
Inlawlawag ti DOLE a mabalin nga agaplikar dagiti babassit a retail wenno service establishment nga addaan iti saan a nasursurok ngem sangapulo nga empleado ken negosio a naapektaran iti kalamidad wenno didigra a gapuanan ti tao.
Naikkan dagiti employer iti pitopulo-ket-lima nga aldaw manipud epektibo a petsa ti wage order tapno maisubmitir dagiti aplikasionda kadagiti Regional Wage Boards.
Impakaammo pay ti DOLE a saan a saklawen ti Minimum Wage Law dagiti rehistrado a barangay micro business enterprises nga addaan iti dagup nga assets a P3-M ken nababbaba, idinto a nasken nga implementaren dagiti employers ti baro a wage order no saan a maaprobaran ti exemption.
