Binigbig ti Catholic Church dagiti pito a Pilipino pakairamanan ti maysa a padi a na-torture ken napapatay iti Abu Sayyaf ken uppat pay a worshipper a natay iti panagbettak a napasamak idiay Marawi idi 2023 kas baro a martyr iti 21st century para iti awan sarday a pammati ken sakripisyoda.
Ti special commemoration dagiti nasao a kabarbaro a martyr ket maisayangkat inton November 9 a Feast of the Dedication of the Lateran Basilica.
Karaman kadagiti mapadayawan ket ni Fr. Rhoel Gallardo a Prelature iti Isabela de Basilan a karaman kadagiti sumagmamano a mangisursuro ken estudyante iti Claret School of Tumahubong a kinidnap iti Abu Sayyaf extremist ken na-hostage iti uppat a pulo ket uppat nga aldaw ken napapatay idi May 3, 2000.
Karaman pay da Junrey Taub Barbante, Janine Orcia Arenas, Evangeline Salces Aromin ken Riza Ramos Daniel a napapatay gapu iti panagbettak ti immula nga improvised explosive device dagiti extremist bayat ti misa iti Mindanao State University main campus idiay Marawi City idi December 3, 2023.
Innominar pay ti Diocese of San Juan, Nueva Ecija ni Fr. Marcelito Paez gapu iti napigsa nga adbokasiyana para iti social justice, human rights ken pagsayaatan dagiti mannalon. Na-ambush ken pinapatay isuna dagiti nakamotorsiklo idi December 4, 2017, nabiit laeng manipod timmulong iti pannakawaya-waya dagiti political prisoners.
Binigbig pay ti Archdiocese of Cagayan de Oro ni Alberto Pinagawa a maysa nga euchristic minister ken lay leader a nangikampania kontra iti illegal logging ken mining idiay Gingoog City ken Claveria ken nangidualo ti karbengan dagiti Lumad indigenous people, napapatay babaen ti pannakapaltogna idi December 24, 2009.
