Idurduron iti Senado ti gakat a mangkissay ti agingga 50% a remittance fees dagiti overseas Filipino workers (OFWs) iti baet ti agtultuloy a reklamo maipanggep ti nangina a singir ken bayad iti panagpatulod iti kuarta iti Pilipinas.
Impila ni Senator Jinggoy Estrada ti Senate Bill No. 1074 a gagem a direkta a kissayan ti gastos dagiti OFW nga agipatpatulod iti pamiliada.
Iti gakat ket obligaren dagiti bangko ken remittance centers a mangipatungpal ti kagudua a diskwento iti remittance fees kasukat iti pammalubos nga ag-claim ti tax deductions para iti operational costs-da.
Gagem ti gakat a masigurado a dadakkel a paset ti sapul dagiti OFW iti maipatulod iti pamiliada ngem iti mabayadan.
Iti listaan ket umabot ti record-high a 38.34 billion dollar ti remittances ti OFWs idi 2024, tallo a porsiento a nangatngato kumparar idi 2023 a katukad ti 8.3% ti gross domestic product ken 7.4% iti gross national income iti pagilian.
