Natalged a nakasubli iti Pilipinas ti uppat a pulo ket innem nga overseas Filipino workers (OFWs) manipod Kuwait ken sangapulo ket pito a Filipino seafarers manipod MV Minoan Dignity kas pinasingkedan ti Overseas Workers Welfare Administration (OWWA).
Simmangpet ti uppat a pulo ket innem nga OFWs iti NAIA Terminal 1 a naglugan iti Kuwait Airways idinto a simmangpet ti 17 seafarers iti Terminal 3 a naglugan iti Emirates.
Ti MV Minoan Dignity ket natamaan iti saan pay a nabigbig a projectile bayat nga agbibiahe iti bagatan iti Strait of Hormuz idi August 18.
Adda sangapulo ket walo a Pilipino crew iti barko ngem natay ti Filipino chief engineer.
Ti 17 a nakalasat a seafarers ket naisalakan ken naipan iti Khasab, Oman sakbay a naisayangkat ti repatriationda iti Pilipinas.
