Natalged a nakaawid iti Pilipinas dagiti pitopulo nga overseas Filipino workers (OFW) manipud Riyadh, Saudi Arabia iti baet ti agtultuloy a panangpa-awid kadakuada ti gobierno, segun iti Overseas Workers Welfare Administration (OWWA).
Simmangpet dagiti OFW a naglugan ti Qatar Airways Flight QR928 a nag-landing iti Ninoy Aquino International Airport (NAIA) Terminal 3.
Segun iti OWWA, nagtinnulong ti ahensia, Department of Migrant Workers, OWWA Regional Welfare Offices III ken IV-A, kasta pay ti Manila International Airport Medical Team tapno maikkan ti kasapulan a tulong dagiti nagawid nga OFW.
Karaman kadagiti naipaay ti tulong iti taraon, transportasion a mapan iti probinsia, temporario a pagyanan para kadagiti agkasapulan ken pinansial nga ayuda.
