Agpapada a nadunor dagiti tallo a lalaki gapu iti stabbing incident idiay Barangay San Antonio, Narvacan, Ilocos Sur idi April 8, 2026.
Dagiti biktima ket agtawen iti duapulo ket siam, painter nga agnaed idiay Barangay San Antonio, Narvacan, Ilocos Sur ken lalaki nga agtawen iti tallopulo, construction worker nga agnaed idiay Barangay Codoog, Narvacan.
Ti met suspek ket agtawen iti limapulo ket lima, mangngalap nga agnaed idiay Barangay San Antonio, Narvacan.
Iti pannaki-uman ti Bombo Radyo Vigan ken ni PCpt. Jumar Castro iti Narvacan Municipal Police Station, nakaawatda iti tawag maipanggep iti napasamak a komosyon iti lugar isu a nagrespondeda.
Segun ken ni Castro, agin-inom dagiti biktima kaduada ti suspek idin ada saanda a nagkikinnaawatan a rason iti nangalaan ti suspek iti buneng ket inatakena dagiti biktima.
Gapu iti pasamak ket agpapada dagiti biktima ken suspek a naaddaan iti stab wounds ken dunor iti agduduma a paset iti bagi isu a naipaagasda iti Ilocos Sur District Hospital para iti pannakatamingda ngem saan unay a nakaru iti sinagabada isu nga insigida met laeng a nakaruar dagiti biktima idinto a ti suspek ket kinemmeg dagiti otoridad.
Kinuna ni Castro a mapapati nga adda laeng iti saan a nagkikinnaawatan dagiti tallo bayat iti panagsasangoda isu a napasamak iti insidente ta awan met iti dati a ririda.
No pay kasta ket saanen nga agipila iti kaso dagiti biktima kontra iti suspek.
