Tallo a lallaki ti mangirekreklamo iti maysa a nangawis kadakuada nga agpusta iti National Basketball Association (NBA) Championships ta saanna nga inted ti inabakda nga umabot iti P1,750,000 milion idiay Barangay Bagar, Candon City, Ilocos Sur.
Iti pannaki-uman ti Bombo Radyo Vigan ken ni PLT. Jovelyn Antalan, tinawagan ti suspek ti maysa a biktima idi Hunyo 2 ket inawisna nga agpusta iti NBA championship game iti nagbaetan ti Indiana Pacers kontra Oklahoma Thunder.
Inallukoy ti suspek ti biktima nga itedna ti pustana kenkuana ta isunanton ti makitulag iti ibagbagana a mang-cater kadakuada.
Inkarina pay nga agdoblento ti abakenda ken itednanto a mammaminsan ngem saanen a nagpakita wenno nagtungpal iti tulagan.
Idi Hunyo 3, napan ti suspek iti balay ti maysa pay a biktima tapno mapanna alaen ti pakpakauna pusta a PhP741,000.00.
Idi Hunyo 4, iti pagtaengan met laeng ti biktima, innala manen ti suspek ti nayon a pusta nga PhP84,000.00 ken PhP50,000 idi Hunyo 5 nga agdagup amin iti P875,000.00.
Ngem idi nangabak ti pinili a team dagiti biktima ket saanen a nagsubli kadakuada ti impustada iti suspek isu a nagdesisyondan nga agipila iti kaso.
