20 a household iti Vigan City ti naipaayanen iti materyales a pagpasimpa kadagiti nadadael a pagtaenganda gapu kadagiti naglabas a bagyo.
Dagiti materyales ket inted ti Vigan City government nga idaulwan ni Mayor Randy Singson.
Iti pannaki-uman ti Bombo Radyo Vigan ken ni Maribelle Artienda manipud iti City Social Welfare and Development, dagiti nasao a bilang ti household ket isu dagiti urgent nga agkasapulan a matarimaanen dagiti nadadael a pagtaenganda.
Dagitoy a household ket manipud iti 12 a barangay iti siudad a pakaibilangan ti Purok a Bassit, San Julian Norte, Pong-ol, Mindoro, Raois, Beddeng Laud, Rugsuanan, Camanggaan, Barangay IX, Purok a Dakkel, Nagsangalan, ken Pantay Laud.
Nagpalagip ni Artienda kadagiti dadduma a nadadaelan iti pagtaengan gapu iti bagyo nga yurayda dagiti maited kadakuada ta manarimaan ti assessment.
