VIGAN CITY – Dumalan iti 14 day quarantine dagiti 20 a mangngalap a taga-Tibanban, Governor Generoso, Davao Oriental a nakalugan ti uppat a fishing vessel a nasaripatpatan idiay Barangay Mambog, Sta. Cruz.
Dayta iti pinasingkedan ni Police Captain Roger Baling-oay, hepe ti Sta. Cruz municipal police station iti pannaki-uman kenkuana ti Bombo Radyo Vigan.
Mapapati a saan nga ammo dagiti mangngalap a maipariten iti sumrek ditoy probinsia kas paset ti enhanced community quarantine gapu ti coronavirus disease 2019 ta intuloyda latta iti umay mangi-deliver ti fishing vessel a kukua ni Marlene Vilog Corpuz, agtawen ti innem a pulo ket dua, maysa a negosyante ken agnaed iti nasao a lugar.
Agsipud iti dayta, nabalakadan dagiti mangngalap a saan da a bumabbaba kadagiti nagluganan da a fishing vessel ket bantayan ida ti Philippine Coast Guard.
