Nagpanawagan dagiti stranded nga Overseas Filipino Workers idiay Lebanon ken ni President Ferdinand Marcos Jr. iti panagawiddan ditoy Pilipinas gapu iti trauma a mapapasaranda.
Iti pannaki-uman ti Bombo Radyo Vigan ken ni Bombo International News Correspondent Hilda Jane Tion, sangagasut tallopulo ket walo da nga agtaltalinaed nga stranded iti shelter kalpasan a saan a nairaman iti naganda kadagiti mairepatriate ditoy pagilian.
Segun ken ni Tion, September 8, 2024 pay laeng idi nagparepatriate isuna ken ti kaduana ngem gapu ta naibaga nga adda travel ban a nairuar kontra kenkuana ket saan a karaman kadagiti nagawid babaen ti chartered flight idi October 25.
Imbingayna a nasakit iti nakemna ta idi laeng December 19 ket naduktalanna nga awan a talaga iti kasona ngem saanda nga inraman a nagawid.
Insaludsodna iti embahada nu dusdusaenda isuna gapu iti panag-video na idi kallabes inaig iti panagpanawaganna iti tulong isu a saanda nga ikaskaso iti panagbiahena.
Nupay impasigurado ti Pilipina a saanda met a baybay-an ida iti Philippine Embassy ta adda kanayon a taraonda ngem aminadoda a ma-stress da gapu ta awan iti pagsapulanda ken awan iti maipatulodda iti pamiliada.
VIDEO – BINC HILDA JANE TION
Inlawlawag met ni Bombo International News Correspondent Caroline Rizardo a delayed iti flights dagiti dadduma nga OFW gapu kadagiti sangsangwenda a kaso, ta idi imbilin kadakuada iti Immigration ti Lebanon nga agpakadada kadagiti employer-da a kas panangsurot ti Kafala System ket isu metten iti panangidarum kadakuada dagiti amoda.
Kinunana a nu laeng nakaawiden idi napan a tawen dagiti padana a Pilipino ket saanda a nastranded iti mano a bulan.
VIDEO – BIJNC CAROLINE RIZARDO
