Pakabuklan a 138 a benepisyaryo manipod dua a barangay idiay Magsingal, Ilocos Sur iti naipaayan ti relief goods manipod Bureau of Fisheries and Aquatic Resources (BFAR).
Iti pannaki-uman ti Bombo Radyo Vigan ken ni Brgy. Captain Rey Talapian manipod Brgy. Puro, Magsingal, dagiti nasao a benepisyaryo ket manipod idiay Barangay Alangan ken Barangay Puro a masakupanna.
Segun kenkuana, manipod iti nasurok uppat a gasut a miembro ti BFAR iti ilida ket dagiti laeng nasao a bilang ti naipaayan ta mismo nga iti ahensia wenno iti munisipyo iti nagpili kadagiti maikkan.
Inlawlawagna nga awan iti pakainaiganna iti nasao a panagpili ta nagipasa laeng iti listaan dagiti miembro iti inaramidna.
No pay kasta ket pagyamananna iti naipaay a tulong para kadagiti kalugaranna nangruna ita nga adu iti agkasapulan.
