VIGAN CITY – Sangagsut nga slot ti idiaya ti Rotary Club of Vigan para iti isayangkatda nga OPERATION TULI: HULING HIRIT SA TAG-INIT wenno libre a panagpakugit kadagiti agtawen iti siam agpangato.
Iti pannaki-uman ti Bombo Radyo Vigan ken ni Dr. R’Lyn Narcelles, alas otso agingga alas nuebe iti agsapa inton bigat, July 19 ti panagparehistro kadagiti interesado ket inton Lunes met ti naituding nga operasyon.
Binalakadan ni Dr. Narcelles dagiti nagannak a kapatangda dagiti annakda a nasayaat ket saan ida a piliten no saanda a kayat tapno saan a masayang ti slot no saanton a kayat ti ubing gapu iti butengda a nasakit ti operasyon.
Ngem nupay kasta, adda ti anesthesia nga itudokda tapno saan a marikna ti ubing ti sakitna no makugit ken resetaanda ti analgesic a tumarenda no mariknadanton ti ut-ot no agbaaw ti anesthesia.
Malaksid dayta, imbalakadna pay a dagiti adda hyspospadia ken kissiwna nga iti ospital ti papananda a pagpakugitan.
Napanunotan ti Rotary Club of Vigan nga ikamat ita daytoy a gannuat tapno no panagseserrek iti pagadalan ket nalaingdanton.
Ti panagpakugit ket napateg tapno maliklikan ti urinary tract infection (UTI) ken nadaldalus met laeng ti panagisbo ti maysa a lalaki.
