Naisalakan dagiti 42 a volunteer kalpasan a mauram ti naglugananda a yate kabayatan ti panagturongda idiay Southern Mindanao tapno mangted iti tulong kadagiti naapektaran iti magnitude 7.8 a gingined.
Nadlaw ti napuskol nga asok manipud iti yate isu a naibakwit dagiti naglugan babaen iti babassit a bangka.
Naipan dagiti amin a volunteer idiay Barangay Pangyan idiay Glan, Sarangani ken awan met ti nadunor wenno natay iti pasamak.
Nupay kasta, pinasingkedan ni Southern Mindanao Mission president Nildo Mamac a nasurok-kumurang 5 percent laeng kadagiti relief supplies ti naisalbar manipud iti nauram a yate.
Nagyamanda met ta natalged amin dagiti volunteer ket inkarida nga agsapulda iti sabali a wagas tapno maituloy ti pannakaited ti tulong kadagiti naapektaran a pamilia.
