Inlawlawag ni Ombudsman Jesus Crispin Remulla a mabalin latta a ma-prosecute ni Vice President Sara Duterte gapu iti saan a husto a pannakaaramat ti minilion a pisos a confidential fund ti opisinana ken ti Department of Education.
Segun ken ni Remulla, mabalin latta a madusa ni VP Sara kadagiti kaso a sangsangwenna ngem saanda a maikkat iti puesto.
Dagiti maalada nga ebidensia ken report manipud iti imbestigasion nga inwayatda ket maipasa iti kongreso ta isudanton ti mangdesision no ma-impeach ti bise presidente.
Inamin ni Remulla a saanna pay nabasa ti kaso a naipila kontra ken ni VP Sara ta dagus a naipiila iti prosecutor general iti Ombudsman.
Uray ti reklamo nga inyendorso ti House Committee on Good Government and Public Accountability ket saanna pay nabasa isu a dagus nga adalenna tapno makita no adda umdas nga ebidensia iti kaso.
