Nagpalagip ti Viron Transit – Vigan City nga agingga laaeng alas dyes iti rabii ti biaheda ita nga aldaw, Huebes Santo ken awan ti biaheda inton bigat, Biernes Santo.
Iti pannaki-uman ti Bombo Radyo Vigan ken ni Renie Pacpaco, Station Manager, agsublinto laengen ti biahe iti alas kuatro iti agsapa ta ngilinenda met ti aldaw ti panagtutuok ni Hesus.
Nupay kasta, iti aldaw ti Biernes ket nakalukat latta ti opisinada iti agingga alas dyes iti rabii para kadagiti kayatna nga agpa-book.
Impasiguradona nga umdas dagiti bus a maaramat ita a kaadu dagiti pasahero gapu iti Semana Santa ta adda ti duapulo ket dua a bus a ti rutana ket Vigan-Laoag.
Nupay kaadu ti pasahero ket saanda a nagpangina ti plete ta no ania ti dati ket isu latta ti masurot, ken maikkan iti 20 percent discount dagiti senior citizen, estudiante, ken dagiti persons with disabilities.
Ti Vigan-Cubao ket P880 ti plete no walk in, ngem no agpa-book ket P930.
