Inkalintegan ni Vice Mayor Virgilio Valle a nabayagen a kayatda a maisayangkat ti dredging operation iti Buaya River iti ili ti Sta. Cruz ta adda planoda a pagbalinento daytoy a tourism site.
Dayta ket kasaruno ti pannakababalaw ti nasao nga addang iti social media ta kaaduanna ket ipagarupda nga adda black sand mining a mapaspasamak.
Iti pannaki-uman ti Bombo Radyo Vigan ken ni Valle, awan ti gastos ditoy ti munisipio no di ket isuda pay ti adda mapastrekna agraman ti barangay.
Inlawlawag ni Valle a ti buwis nga ibayad ti Fortuna Mining ket 30 pct ti mapan iti Provincial Government of Ilocos Sur, 30 pct iti Local Government Unit ken ti 40 pct ket pagbibingayan dagiti barangay a maapektaran iti maisaysayangkat a river dredging.
Plano ti LGU iti masangwanan a mangawis kadagiti naayat nga ag-invest iti jetski tapno addanto pagliwliwaan iti nasao a lugar ken kayatda a maikkan iti pagsapulan dagiti agindeg.
Naituding met ti panangiruar ti mayor ti ili iti Executive Order a ti gagemna ket mangbukel iti monitoring team a manamnama a buklen iti barangay captains kadagiti nadumaduma a barangay ken 2 nga agindeg iti kada lugar.
Kinarit ti bise mayor dagiti mayat a dumngeg, dagiti agbutbuteng, ken dagiti mangpadpadakes iti nasao nga addang iti social media a dar-ayanda ti public consultation inton Martes, Hulyo 7, 2026 ta malawlawaganda.
