Umaboten iti P19.065 trillion ti pakabuklan a nabatbati nga utang iti gobierno iti Pilipinas iti agtapos ti Hunyo kas pinasingkedan ti Bureau of Treasury (BTr).
Nangat-ngato dayta iti P518.98 billion no yarig iti P18.546 trillion idi agtapos iti Mayo ken nangat-ngato ngem iti P17.267 trillion a nairekord idi Hunyo idi napan a tawen.
Segun ti BTr, ti 2.8 a porsiento a panagpangato iti utang ket kangrunaan a rason iti ad-adun nga utang iti gobierno, iti man uneg wenno ruar iti pagilian, tapno pondoan dagiti programa para iti pagdur-asan.
Nakatulong met iti napigpigsa a piso tapno makissayan ti panagpangato iti pakabuklan nga utang.
Umabot iti P12.837 trillion ti domestic debt wenno utang iti uneg iti pagilian. Nangat-ngato dayta iti 2.74 a porsiento kumparar idi Mayo ken 7.43 a porsiento kumparar iti isu met la a panawen idi napan a tawen.
Iti nasao a panawen, nakairekord ti gobierno ti P342.93 billion a net issuance iti government securities, idinto a nakissayan met ti P0.60 billion ti gatad ti onshore dollar bonds gapu iti panagpigsa ti piso.
Kabayatanna, umaboten ti P6.227 trillion ti external debt a nangat-ngato iti P176.66 billion manipod P6.051 trillion idi agtapos iti Mayo.
