VIGAN CITY – Saanen nga interesado nga agidarum pay ni Karen Tacardon, ti asawa ni Rustom Tacardon nga agtawen ti dua pulo ket lima a natay iti aksidente idi rabii ti February 6 idiay Barangay Nagbettedan, Sto. Domingo.
Segun ken ni Karen, kayat na a tulungan laengen ida iti akin-kukua ti Terelyn minibus iti gastuen da iti pannakaimasayag ken pannakaitabon ni Rustom kasta pay iti bassit a pangrugyan na iti pangbiyag nanto ti naulila nga anak da a babai.
Maipalagip nga idi rabii ti February 6, agawid kuman ni Rustom idi mapapati a napaspas iti panagmaneho na iti motorsiklo a nagluganan na ta posible a nakainom iti arak ket saan na a nadlaw nga adda iti nakaparada a minibus iti nagnaan na isu a natukbob na iti likudan a paset iti lugan ket naipasngat iti motorsiklo na.
Agsipud iti dayta, narumek iti helmet ti biktima ket nagsagaba iti nakaro a dunor iti ulo ken naduma-duma a paset iti bagi na ket naitaray idiay Ilocos Sur District Hospital – Magsingal ngem naideklerar a dead on arrival.
Ingunam-gunam ni Police Captain Christopher Ramat, hepe ti Sto. Domingo municipal police station, nga adda latta iti sungsungbatan ti akin-kukua iti minibus a tinukbob ni Tacardon agsipud ta awan iti naan-anay a warning device nga inkabil da a mangballaag kuma kadagiti aglabas nga adda iti nakaparada a lugan tapnu maliklikan iti disgrasya.
Kabayatanna, aminado ni Nagbettedan, Sto. Domingo Barangay chairman Mar Donato a nasipnget iti lugar a nakaparadaan iti nadadael a minibus isu a posible a saan a nadlaw ti biktima.
Nairanrana pay a ti kaaldawan iti pannaka-aksidente ti biktima ket naipatungpal idiay ili a Sto. Domingo iti anti-drunk driving act a mangiparit iti panagmaneho a nakainom ti arak.
