VIGAN CITY – Ituloy iti pamilya ni Reynaldo Tatson nga agtawen ti 49 iti mangipila iti kaso kontra ken ni Melchor Tatson nga agtawen ti 28 gapu iti pannakatay na ta pinaltugan ni Melchor ni Reynaldo idi napan da naganup iti kabanbantayan a paset ti Sitio Caset, Maradodon, Cabugao ta inpagarup na nga alingo ni Reynaldo.
Agsipud iti dayta, kaso a reckless imprudence resulting to homicide iti inpila ti Cabugao municipal police station kontra ken ni Melchor, malaksid iti panagikot na iti saan a lisensyado a paltog ken kitkitaen da a naimbag nu naglabsing pay ti enhanced community quarantine gapu iti papan da panaganup a kas pinasingkedan ni Police Captain Ramil Llarenas, hepe ti Cabugao PNP.
Kabayatanna, agkidkiddaw iti pammakawan ni Melchor kadagiti pamilya ni Reynaldo nga uliteg na agsipud ta saan na met nga ingagara a paltugan nga isu iti nakatayan na.
Segun ken ni Melchor, saan na unay nga ammo nu anya iti napagtutulagan dagiti kakadua na a napan naganup agsipud ta kimmamakam laeng kadakuada.
Namindua a kinita na iti ayan ni Reynaldo ket iti panagkita na, alingo isu nga idi maikapamitlon a panangsirig na, isun iti panangpaltog na ket nakigtot laengen idin ti kadua na nga agan-anup iti napuntaan na.
