Positibo iti drug test ti maysa a lalaki a nakemmeg iti buy-bust operation idiay Sta. Cruz agraman dagiti ebidensya a naala manipud kenkuana.
Ti suspek ket agtawen iti tallopulo ket innem, agnaed iti nasao nga ili.
Iti pannaki-uman ti Bombo Radyo Vigan ken ni Police Chief Master Sergeant Andrew Christian Balangue manipud Sta. Cruz Police Station, datin nga adda kasona ti suspek idiay Metro Manila gapu met laeng iti iligal a droga.
Manarimaan pay laeng ti naan-anay nga imbestigasyon dagiti pannakabagi ti linteg iti napasamak isu a saanda pay a maibaga no kasano kalawa ti operasyonna.
Nangrugi a sinipsiputanda ti tignay ti suspek sipud idi nag-viral ti video-na iti social media nga agar-aramat iti iligal a droga.
Naala manipud iti operasyon ti 0.29 a gramo ti shabu nga aggatad ti P1,972 a naikabil iti lima a piraso ti heat-sealed transparent plastic sachets a nagserbi a buy-bust item ken possession.
Dagiti non-drug evidence ket maysa a piraso iti P1,000 bill a nagserbi a buy-bust money ken dua a lighter.
