Saanen nga interesado nga agipila iti kaso ti biktima iti pannagbat a napasamak idiay Barangay Pug-os, Cabugao agsipud ta kabagyanna met laeng ti suspek.
Nabigbig ti suspek a ni Nicolas Rivera Encillo, agtawen iti innem a pulo ket tallo, agnaed iti nasao a lugar.
Ti met biktima ket ni Limuel Javier Salmo, agtawen iti tallopulo ket walo, carwash crew, agnaed iti Barangay Quezon, iti nasao nga ili.
Iti pannaki-uman ti Bombo Radyo Vigan ken ni Police Major Juan Jhayr Maggay, ti biktima ket live-in partner ti anak ti suspek isu a naaramid ti affidavit of no interest to file a case.
Awan ti dati a nagap-apaan ti suspek ken biktima malaksid laeng ti pannakairita ti suspek iti barado a karburador ti motorsiklo ti biktima a puon ti nangalaan ti suspek iti buneng nga intagbatna iti biktima.
Napurwan met ti akin-kannigid a pungwa-pungwan ti biktima nga ita ket agpapaimbag iti ospital.
