Pimmusayen ti babai a biktima iti pammaltog a napasamak idiay Barangay Patong, Magsingal, Ilocos Sur.
Nabigbig ti biktima a babai a ni Mary Rose Tabag Torreno, agtawen iti tallopulo ket dua, maysa a mangisursuro.
Ti met asawana a ni Maynard Unciano Torreno, agtawen iti tallopulo ket tallo, mannalon ket naideklarar a dead on arrival.
Kabayatanna, ti anakda nga agtawen iti siam, ket saan a naan-ano.
Iti pannaki-uman ti Bombo Radyo Vigan ken ni PLT. Richard Pajo, nakalugan dagiti biktima iti traysikel idin ta maysa a nakasuot iti bonnet ti dimsaag a nangpaltog kadakuada iti namin-ano a daras.
Nagsagaba dagiti biktima iti tama ti paltog ti nadumaduma a paset ti bagida ket naipaagasda iti ospital ngem saanda a nakalasat.
Maysa a managan iti Erwin Ubilas ti nadakamat ti biktima a babai idi sibibiag pay a nangpaltog kadakuada.
Mapapati a caliber 45 ken M16 rifle ti naaramat iti pammaltog maibasar kadagiti nasarakan nga empty shell iti nakapasamakan ti krimen.
Agtultuloy ti panangduktal dagiti pannakabagi ti linteg no ania ti motibo ti krimen ta idi Enero 2025 ket suspek ti biktima a lalaki iti pammaltog a nakatayan ti kasinsinna.
