--Ads--

Nangangay dagiti estudyante ti University of Northern Philippines (UNP) iti natalna a protesta kas panangkontra iti plano a pannakaibangon ti Pax Silica iti pagilian, gapu iti panagamakda a saan a dagiti Pilipino ti kangrunaan a mabenepisiaran ti natural resources ti Pilipinas.

Iti pannaki-uman ti Bombo Radyo Vigan ken ni Clio Nadine Rojas, Convenor ti Defend Ilocos Sur, kinunana a posible a mangiturong iti pannakagundaway dagiti natural a gameng ti pagilian, partikular ti panagala ken panagproseso kadagiti kritikal ken manmano a mineral a maus-usar iti panagpataud kadagiti microchip, bateria ken dadduma pay a baro a teknolohia, agraman ti artificial intelligence (AI).

Inyunay-unay ni Rojas a maamakda a dagiti ganggannaet nga interes, pakairamanan ti Estados Unidos, nga agkasapulan kadagiti materiales para kadagiti industriada iti teknolohia, ket ad-adda a magunggonaan iti mineral resources ti Pilipinas ngem dagiti lokal a komunidad ken dagiti umili a Pilipino.

Gapu iti daytoy a rason, impaganetget ti grupo a kasapulan a sukimaten ti pudno a panggep ken posible nga epekto ti Pax Silica iti pagilian, nangruna iti pagimbagan dagiti lokal a komunidad, aglawlaw ken nasional nga interes.

-- ADVERTISEMENT --

Innayon ni Rojas a nasaysayaat no dagiti mismo a lokal a komunidad ti magunggonaan iti natural resources ti pagilian gapu ta kunana nga adda kabaelan dagiti Pilipino a mangpadur-as ken mangusar iti bukodda a gameng para iti bukodda a pagimbagan.

Impaganetgetna pay a saan a kasapulan ti Pilipinas dagiti ganggannaet a manggundaway iti natural resources ti pagilian, gapu ta dagiti Pilipino ti rumbeng a kangrunaan a benepisiario dagiti natural resources a masarakan iti bukodda a teritorio.