Linawlawagan ti University of Northern Philippines ti misinformation a nagwaras a saan a mabalin nga umay dagiti nagannak wenno guardians iti general graduation ceremony.
Iti pannaki-uman ti Bombo Radyo Vigan ken ni Rolando Navarro, Vice President for Academic Affairs, saan a pudno a saan a mabalin nga umay dagiti nagannak wenno guardian ta kinaagpaysona ket maragsakanda pay a makakita kadagiti agturpos a kuyogen dagiti nagannakda.
Innayonna a makastrek ken makapagpaset dagiti nagannak/guardian iti intero a seremonya iti uneg ti gymnasium manipud iti panagmartsa, ken panangikabil iti hood dagiti agturpos iti masteral wenno doctoral.
Honor student wenno saan ket saan a makauli dagiti nagannakda iti entablado para iti panangawat iti diploma gapu iti amakda nga amangan ta adda madi a mapasamak no agdudupudopda, nga isu pay ti rason no apay a ‘clustered’ itan ti seremonya.
Ngem iti college graduation ket isu ti gundaway a makauli dagiti nagannak iti entablado kadua dagiti annakda nga agturpos.
Ti seguridad, oras, ken phasing ti programa ti rason no apay a naplano iti kasta a wagas ti seremonya iti panagturpos dagiti rinibo nga agad-adal iti nasao nga unibersidad.
