VIGAN CITY – Natalek ti Ilocos Sur provincial government a makabangon ti ekonomia ti probinsia ita a nalukatanen ti turismo ta gapu iti Covid19 ket temporaryo a naipasarra ti tourism sector ti pagilian ken naidalan iti quarantine restrictions ti intero a pagilian.
Segun ken ni Gov. Ryan Singson, dakkel a tulong ti pannakailukat ti turismo kadagiti turista nga aggapu iti Luzon ita a pandemya ta maikkan manen ti gundaway a makatrabaho dagiti naawanan kas kadagiti tour guide, kutsero, hotel staffs ken dadduma pay.
Malaksid ti dayta, maikkan pay ti gundaway dagiti babassit a negosyante a mailako dagiti produktoda kdagiti turista a pumasiar ditoy probinsia.
Sumagmamano kadagiti maipampannakkel a produkto ti probinsia ket ti Vigan longganisa, bagnet, empanada ken dadduma pay.
Nupay kasta, nagyaman ni Department of Tourism Secretary Bernadette Romulo-Puyat iti pannakitinnulong ti probinsia tapno in-inut a maibangon ti industriya ti turismo ita nga adda pandemia.
Ni Puyat ti maysa kadagiti nangidaulo iti pormal a pannakailukat ti turismo ti Ilocos Sur kaduana ni DOT –Region 1 Director Jeff Ortega.
