VIGAN CITY – Inlawlawag ti mayor ti Tuy, Batangas nga iteted da iti amin a kasapulan dagiti evacuee a naapektaran iti phreatic eruption ti Taal volcano a nagkamang kadakuada.
Ti agdama, umabot ti nasurok innem a ribo ti bilang dagiti evacuee nga agtaltalinaed kadagiti nasurok a sangapulo nga evacuation center idiay Tuy, Batangas.
Ti pannaki-uman ti Bombo Radyo Vigan ken ni Mayor Randy Afable, tunggal evacuation area iti ilida ket adda iti nabilin a representative ti local government unit (LGU) nga isu ti mangkita kadagiti kasapulan ti evacuees.
Malaksid iti dayta, inaldaw ken rinabii nga agliklikmot kadagiti evacuation area ni Afable tapno personal a kumustaen ti kasasaad dagiti evacuee a tultulonganda.
No pay kasta, saan a paglibakan ti mayor nga agkurang ti maipapaayda a gatas para kadagiti maladaga ken folding bed para kadagiti senior citizen ngem kunana a marisrisutda babaen iti pannakitinnulong dagiti stakeholder ken grupo.
