Inikkat ti serbisyo ti National Police Commission (NAPOLCOM) ti sangapulo ket maysa a polis a karaman iti mapapati nga operasyon kontra droga ken ti kaso dagiti mapukpukaw a sabungero.
Karaman kadagiti naikkat iti puesto ti sumagmamano nga opisyal ken miembro ti Philippine National Police (PNP) manipod Regional Drug Enforcement Unit iti National Capital Region Drug Enforcement Unit iti National Capital Region Police Office (NCRPO), pakairamanan da PLt. Col Ryan Jay Orapa, PMaj. Mark Phillip Almedilla, PSMS Mark Anthony Manrique, PSSg. Edmon Muñoz, PSSg. Robert Allan Raz Jr., PSSg. Denar Roda, PCpl. Alric Natividad, PCpl. Reynaldo Seno Jr., PCpl. Ronald John Lanaria, Pat. Rufino Panghulan ken Pat. Develyn.
Segun ti NAPOLCOM, napaneknekan a guilty dagiti polis iti dua a bilang ti grave misconduct ken dua a bilang ti conduct unbecoming of a police officer maipanggep iti agsina a reklamo iti mapapati a panagdukot iti salinong ti operasyon kontra droga idi napalabas nga administrasyon.
Maibasar iti reklamo da Milagrose Estacio ken Elizabeth Sotto idi September 3, 2025, inakusaranna dagiti sumagmamano a polis a nangdukot kadagiti annakda iti agsina nga operasyon idi 2021.
Sabali pay a kaso ti sangsangwen ti sumagmamano a naikkat a polis maipanggep iti pannakapukaw dagiti sabungero idi 2021 agingga 2022, pakairamanan da Dane Mark Carlos ken Charles Dean Sotto a mapapati a nakemmeg kadagiti peke nga anti-drug operations ken agingga ita ket saan pay a nasarakan.
Segun ken ni NAPOLCOM Chair Rafael Vincente Calinisan, ti kidnapping ket maysa a nadagsen a krimen a maibilang a panangdadael iti talek iti publiko a rumbeng a saan nga yaleng-aleng.
