Nagballaag ni Senador Erwin Tulfo a posible a pumaot ti peggad iti ekonomia ti riribuk iti Middle East, isu a nagpanawagan kadagiti ahensia ti gobierno nga agtinnulong tapno salwadan dagiti marigrigat nga umili.
Segun ken ni Tulfo, Chairman ti Senate Committee on Social Justice, Welfare, and Rural Development, saan a mabalin a “one-time thing” laeng ti aramiden ti gobierno ita a kumarkaro ti riribuk iti sabali a pagilian.
Iti panagdengngeg para iti pannaka-amyendar iti Pantawid Pamilyang Pilipino Program ken panang-institutionalize iti Sustainable Livelihood Program, inamin ti senador a madanagan no agingga kaano a makabaelan ti agdama nga ayuda ti krisis.
Kangrunaan a kinarit ti senador dagiti ahensia nga ipaayan iti tulong dagiti maawagan a “near-poor” wenno dagiti makapaspastrek laeng iti minimum wage a masansan a maliplipatan kadagiti social assistance program.
