VIGAN CITY – Impanamnama ni Mayor Jovellen Aznar iti San Quintin, Abra a maawaten dagiti agindeg a naapektaran iti gingined idi 2022 ti tseke a tulong para kadagiti nadadael a pagtaenganda.
Iti pannaki-uman ti Bombo Radyo Vigan ken ni Aznar, inton umay a bulan ti manamnama a panangiruar ti Department of Human Settlements and Urban Development kadagiti tseke a maited kadagiti agindeg a nadadaelan iti pagtaengan.
Tallopulo a ribo a pisos ti maawat dagiti agindeg a totally damaged ti pagtaenganna idinto a sangapulo a ribo a pisos kadagiti partially damaged.
Maibasar iti record, 549 dagiti partially damaged ken 49 met dagiti totally damaged.
Dua a tawen sipud iti iduduprak ti napigsa a gingined a nagsentro idiay Abra, in-inut metten a naisubsubli iti normal a biag dagiti agindeg ta addan dagiti nakapatarimaan iti pagtaenganda.
