Dead on arrival ti maysa a lalaki a napaltugan idiay Barangay Bangbangar, Bangued, Abra.
Nabigbig ti biktima a ni Manuel Garcia Bonete Sr., agtawen iti limapulo ket walo, tricycle driver, taga-Sitio Surkok.
Maibasar iti inisyal nga imbestigasyon, imanmaneho ti biktima ti traysikelna nga agturong idiay Bangbangar Elementary School idin ta dimteng iti likudanna ti suspek a nangpaltog kenkuana.
Nagsagaba iti tama ti bala ti paltog ti nadumaduma a paset ti bagi ti biktima ket naitaray iti ospital ngem saanen a nakalasat.
Natirwan met iti naiwawa a bala ni Jairha Laureta Bocarile, agtawen iti duapulo ket maysa, taga-Bangbangar a naipaagas met laeng iti ospital para iti pannakatamingna.
Naglibas ti suspek kalpasan ti pasamak ken narekobre iti nakapasamakan ti krimen ti sangapulo a fired cartridge cases ti caliber .45 ken deformed slug.
Iti agdama, im-imbestigaran dagiti pannakabagi ti linteg ti pasamak.
