Maur-urayen ti resulta ti drug test ti nakemmeg a Top 10 Regional Target PDEA Target List ken High Value Individual iti salinong ti Coplan “Caretaker” iti naisayangkat a buy bust operation idiay Barangay San Julian Norte, Vigan City a drug cleared barangay.
Ti suspek ket agtawen iti uppat a pulo ket lima a lalaki, naasawaan, construction worker nga agnaed idiay Barangay San Julian Sur, Vigan City.
Naala kenkuana ti drug evidence a dua a piraso ti heat-sealed transparent plastic sachets a naglaon ti mapapati a shabu nga agdagsen ti dua a gramo ken aggatad ti P13,600.
Dagiti non-drug evidence a naala ket pakairamanan ti maysa a piraso ti P1,000 a nagserbi a buy bust money; uppat a piraso iti counterfeit one thousand peso bill; P390; tulbek ken maysa a unit iti Real Me 11 a cellphone.
Iti pannaki-uman ti Bombo Radyo Vigan kenni Police Lieutenant Colonel Reynaldo Mendoza Jr. ti Vigan City Police Station, dati a drug surrenderee ti suspek, ken namidua a na-test buy sakbay a nangisayangkatda ti operasyon.
Ti umuna a test buy ket adda video na nga agus-usar iti droga iti uneg ti maysa a transient house, idinto ti maikadua ket nagpositibo manen a naalaan ti droga.
Segun kenni Police Lieutenant Colonel Mendoza, saanen a pimmalag ti suspek idi kinnemmegda.
Kabayatanna, nangisayangkatdan ti tactical interrogation ken alallukoyenda ti suspek nga ibutaktak no sino dagiti kakadduana ken no adda pay on-going a transaction-na.
