VIGAN CITY – Nadundunor dagiti tallo a naglugan iti kotse ta naidungparda iti 10-wheeler truck iti national highway idiay Barangay Maynganay Sur, Sta. Maria, Ilocos Sur idi rabii iti May 5, 2024.
Ti nagmaneho ti Isuzu 10-wheeler truck ket ni Jerly Uricia Pimentel, agtawen iti duapulo ket pito, baro, company driver; kaduana ni Jerry Belbano Viloria, agtawen iti duapulo ket uppat nga agpada nga agnaed idiay Barangay Macatcatud, Magsingal; idinto a ti nagmaneho ti Toyota Vios ket ni Allan Chua De Guzman, agtawen iti duapulo ket pito, baro nga agnaed idiay Barangay Poblacion, Urdaneta City, Pangasinan; kaduana da Crystal Marin Escat, agtawen iti duapulo ket maysa ken maysa nga agtawen iti tallo nga agpada nga agnaed idiay Barangay San Jose, Urdaneta City, Pangasinan.
Iti pannaki-uman ti Bombo Radyo Vigan ken ni PMaj. Macario Dulawan Jr. a hepe ti Sta. Maria Municipal Police Station, agpapabagatan a direksyon ti 10-wheeler truck idinto nga agpaamianan ti kotse ngem idi nadanonda iti nasao a lugar ket kellaat nga immagaw ti linya ti kotse isu a naidungpar iti 10-wheeler truck.
Segun ken ni Dulawan, gapu ti impact ket nagpusipos pay ti kotse sakbay a naipan iti igid iti kalsada.
Naipan iti Ilocos Sur District Hospital – Paratong, Narvacan dagiti nadunor babaen kadagiti nagresponde a kameng ti Municipal Disaster Risk Reduction and Management Office ken Sta. Maria Municipal Police Station.
Gapu ti pasamak ket pagan-annaden ni Dulawan dagiti motorista iti panagmaneho tapno maliklikan ti aksidente.
VIDEO – PMAJ. MACARIO DULAWAN JR.
