Insalakan ti Philippine National Police-Criminal Investigation and Detection Group (PNP-CIDG) ti tallo a Pilipino a mapapati a nakaibalud iti maysa a condominium sadiay Malate, Manila tapno mangisayangkat iti love scam operations.
Segun iti CIDG, mapapati a napilitan dagiti biktima a mangikabesa kadagiti script a maaramat iti panangallilaw kadagiti ganggannaet a kliyente sakbay a naipatulodda iti mapapati a scam hub iti Visayas.
Nakemmeg pay iti operasion idi Oktubre 28 ti dua a ganggannaet a nabigbig a da Taiwanese Pen, agtawen iti 32, ken Malaysian Lee, agtawen iti 38, a sumangsango iti kaso gapu iti panaglabsingda iti Expanded Anti-Trafficking in Persons Act ken dadduma pay a mainaig a linteg.
Birbiruken itan dagiti otoridad ti mapapati a scam hub iti Visayas a mabalin a nakaibaonan ti nasurok 20 a dadduma pay a Pilipino kalpasan ti kapada a panagsanayda ken agpegpeggad a mapasaran ti pannakaabuso.
